Лет на српски авион над Косово денес предизвика бурни реакции и бројни шпекулации, но зад целата приказна се крие сосема поинаква реалност.
Станува збор за авион од типот Beechcraft King Air 350, кој го користи SMATSA – српската управа за воздушна навигација – за специјализирани технички мисии. Неговото движење, кое многумина го забележаа преку апликации за следење летови, изгледало необично поради честото кружење и повторување на истите рути.
Сепак, токму тие маневри се карактеристични за т.н. калибрациски летови. Овие мисии имаат клучна улога: проверка и прилагодување на навигациските системи што ги користат пилотите при слетување и полетување.
Авионот полетал од Белград и по повеќе од два часа лет се вратил на истата локација, движејќи се на висина од околу 21.000 стапки. За време на летот, биле тестирани системи како инструменталниот систем за слетување, како и други радио-навигациски уреди кои се од суштинско значење за безбедноста во воздухопловството.
Ваквите проверки редовно се спроведуваат низ Европа, врз основа на договори со аеродроми и служби за контрола на летање. Истиот авион неодамна бил ангажиран и во Словенија, каде вршел слични активности.
Иако на прв поглед ситуацијата изгледаше загрижувачка, станува збор за стандардна процедура без никаква безбедносна закана.
