Голем пожар избувна синоќа на Савскиот насип во Нов Белград, каде пламен за кратко време целосно уништи познат сплав што се наоѓал на брегот. Огнот се појавил околу 21 часот, а густ чад и силен пламен биле видливи од повеќе делови на градот.
Според сведоци, ситуацијата брзо станала опасна откако од внатрешноста на објектот се слушнале неколку силни детонации, што предизвикало дополнителна паника кај присутните. Неофицијално, се претпоставува дека експлозиите настанале од плински боци во кујнскиот дел на сплавот.
Пожарникарските екипи веднаш интервенирале и започнале борба со огнената стихија, но работата им ја отежнувал силниот ветер, кој постојано го ширел пламенот и создавал ризик пожарот да зафати и други соседни објекти. Поради опасноста, полицијата го обезбедила просторот и го евакуирала реонот околу местото на пожарот.
Според првичните информации, сплавот бил извлечен на копно поради реконструкција, а огнот многу брзо се проширил и на околниот материјал. Интервенцијата била дополнително отежната и поради тесниот пристап на насипот, па екипите користеле вода директно од реката за да го локализираат пожарот.
Причините за несреќата засега не се познати. Се разгледуваат повеќе можни сценарија, меѓу кои технички дефект или невнимание при работите на објектот. По завршувањето на увидот, надлежните служби треба да утврдат како точно настанал пожарот. Материјалната штета е голема, но според досегашните информации, избегната е поголема трагедија.
