Тринаесетгодишно девојче е во животна опасност по тешка сообраќајна несреќа што се случила пред трговски центар, кога врз неа налетал автомобил марка BMW, управуван од 19-годишен младич.
Според првичните информации, возилото ја удрило додека минувала преку пешачки премин. Очевидци тврдат дека ударот бил толку силен што девојчето било исфрлено неколку метри во воздух.
Некои од присутните на местото на настанот велат дека семафорот покажувал црвено светло во моментот кога автомобилот поминал низ раскрсницата, но овие информации засега не се официјално потврдени.
Брзата помош веднаш пристигнала и девојчето било итно транспортирано во Ургентен центар. Според извори од болницата, таа била примена со сериозни повреди и веднаш пренесена во операциона сала.
Лекарите констатирале тешка телесна траума, внатрешно крварење и губење на свест веднаш по ударот. Девојчето било интубирано и нејзината состојба се оценува како критична.
Полицијата работи на расчистување на сите околности поврзани со несреќата, а ќе се утврдува дали имало прекршување на сообраќајните правила.
Истрагата е во тек.
