Хрватската јавност е вознемирена по апсењето на 46-годишен детски психијатар од Клиничко-болничкиот центар во Осиек, кој се товари за тешки злоупотреби на малолетни пациенти и за овозможување консумирање дрога. Според информациите што ги објави „Индекс.хр“, станува збор за лекар кој со години работел во Институтот за детска и адолесцентна психијатрија.
Станислав Рогуља, специјалист по психијатрија и негов колега, тврди дека проблематичното однесување на уапсениот било познато во клиниката со години, но дека раководството и надлежните служби не презеле никакви мерки. Според него, постоел систем на заштита што одел од правниот сектор, преку администрацијата, па сè до раководните лекари во одделот.
Полицијата соопшти дека осомничениот ја злоупотребувал својата позиција во периодот од 2016 до 2019 година, при што на четири малолетни пациенти им упатувал непристојни коментари, ги допирал и им давал дрога. Истрагата утврдила и дека од 2018 до 2023 година, дрога им давал и на возрасни лица од неговото опкружување.
Рогуља наведува дека уште од почетокот бил сомничав, особено поради фактот што психијатарот речиси исклучиво работел со адолесцентки, а не со машки пациенти. Според него, станувало збор за намерен избор на исклучително ранлива група.
Тој додава дека преку разговори со пациенти и лично набљудување станало јасно дека лекарот позитивно зборувал за алкохол, цигари и дрога, а истовремено и самиот ги користел. Во таква атмосфера, како што вели, било невозможно сериозно да се работи на превенција и лекување на зависности.
Рогуља сведочи и за несоодветен физички контакт со пациентките, вклучувајќи допирање и навлегување во нивниот личен простор. Во еден случај, како што тврди, лично влегол во просторија каде психијатарот бил клекнат пред пациентка со рацете во нејзиниот скут. Според него, вакви ситуации не биле изолирани и имало повеќе сведоци.
Апсењето, според неговите зборови, веројатно немало да се случи доколку новинарот Драго Хедл не ја објавел исповедта на мајка од Осиек. Таа го пријавила психијатарот за брутален физички напад врз нејзиниот 16-годишен син со аутизам, тврдејќи дека бил удиран, навредуван и понижуван пред сведоци.
Рогуља потсетува и на друг инцидент, во кој психијатарот, наводно, физички нападнал психотично дете врзано за кревет, а потоа и докторка која го пријавила случајот во полиција. Иако пријавата постоела, случајот никогаш не бил целосно расчистен.
Тој тврди дека оние кои пријавувале неправилности биле санкционирани, додека осомничениот останувал заштитен. Рогуља и неколку негови колеги, според неговите зборови, добиле опомени, деградации, а тој на крајот и отказ.
Дополнително, тој наведува дека психијатарот бил познат по тоа што излегувал и се опивал со средношколки – негови пациентки – што, како што вели, било јавна тајна меѓу персоналот. Според него, сè тоа било резултат на системско молчење и прикривање.
