Во рамки на интензивните контроли на Агенцијата за храна и ветеринарство (АХВ), инспекторите оваа недела открија и уништија 1.010 килограми небезбедна „здрава храна“ кај 14 оператори, во склоп на вкупно 373 контроли на објекти за производство и промет со храна.
При проверките, утврдено е дека 14 оператори воопшто не биле регистрирани како оператори со храна, што претставува сериозно прекршување на законските обврски. За сите утврдени недоследности, АХВ издаде 65 решенија, 19 опомени и 44 парични казни, во вкупна вредност од 20.550 евра во денарска противвредност.
Конкретно, контролите открија:
- 9 оператори со незадоволителни хигиенски и технички услови во објектите;
- 7 оператори со храна со поминат рок на употреба;
- 2 оператори со храна со непознато потекло;
- 18 оператори со несоодветно означена храна;
- 23 вработени без задолжителен здравствен преглед;
- 2 оператори без воспоставени процедури за Добра производствена и Добра хигиенска пракса или без соодветни записи;
- 2 оператори кои не спроведувале задолжителна дезинфекција, дезинсекција и дератизација.
Со овие мерки, АХВ ја потврдува својата посветеност на заштита на здравјето на потрошувачите и почитување на законските обврски за безбедност на храната.
