Денес на Клиниката за ТОАРИЛУЦ во Скопје беше изведена првата операција во Македонија за вградување тотална протеза на колк со примена на навигациски систем.
Интервенцијата ја изведоа д-р Константос Макридис од Грција и д-р Игор Мерџаноски, директор на Клиниката и раководител на ортопедската служба, заедно со медицинскиот тим. При операцијата беше користена компјутерска навигација со 3D визуелизација во реално време, што овозможува исклучително прецизно позиционирање на протезата.
Паралелно со хируршката интервенција, дел од медицинскиот и помошниот персонал помина едукација за користење на навигацискиот систем, што ќе овозможи негова поширока примена во иднина. За денес се планирани и три операции за вградување протези на колено со навигациски систем, од кои една вклучува истовремена замена на двете колена – сложена интервенција кај пациенти со билатерална гонартроза.
Примената на оваа технологија носи значајни придобивки за пациентите, меѓу кои подобра функционалност и стабилност на зглобовите, подолг животен век на протезите, намален ризик од компликации и побрзо постоперативно закрепнување.
Со оваа интервенција, Клиниката за ТОАРИЛУЦ се позиционира како водечки центар во Северна Македонија за современа и високо прецизна хирургија на колк и колено.
