Украинскиот претседател Володимир Зеленски предупреди дека ескалацијата на конфликтот на Блискиот Исток може сериозно да ја ослабне одбраната на Украина, особено кога станува збор за снабдувањето со ракети за воздушна одбрана. Според него, долготрајна криза меѓу САД, Израел и Иран директно му одговара на рускиот претседател Владимир Путин, бидејќи ги одвлекува вниманието и ресурсите од Украина.
Зеленски оцени дека ваквата состојба не само што ги крева цените на енергијата, туку може да предизвика и сериозен недостиг од системи и ракети што му се неопходни на Киев за одбрана од руските напади. Тој посебно предупреди на можен дефицит на ракети „Патриот“, наведувајќи дека американското производство е ограничено, додека побарувачката во повеќе кризни жаришта нагло расте.
Украинскиот лидер истакна дека одолговлекувањето на мировните разговори дополнително ја влошува ситуацијата. Според него, преговорите веќе се пролонгираат токму поради развојот на настаните на Блискиот Исток, што, како што тврди, повторно оди во прилог на Москва.
Во својата оценка за Вашингтон, Зеленски рече дека Доналд Трамп сака да настапува како посредник, а не како страна што отворено би застанала зад Украина. Тој смета дека американската стратегија е насочена кон одржување директен канал со Путин, без дополнително заострување на односите.
Пораката од Киев е јасна: секое пренасочување на западната воена помош кон други конфликти може да остави опасни последици за украинскиот фронт, токму во момент кога Русија ги засилува нападите.
