Неколку силни експлозии одекнаа во главниот град на Катар, Доха, што предизвика загриженост и големо внимание во светските медиуми. Израелски извори потврдија дека нападот бил насочен кон раководството на терористичката организација Хамас.
Според очевидци, над главниот град се подига густ чад, а жителите пријавиле дека слушнале најмалку пет експлозии. Израелската одбранбена војска (ИДФ) објави дека операцијата била „прецизен напад“ врз високите функционери на Хамас, кои се директно одговорни за насилните дејствија против Израел.
Според извори блиски до арапските медиуми „Ал Арабија“, во нападот бил убиен и главниот преговарач на Хамас, Калил ал-Хаја, но бројот на жртви и повредени сè уште не е официјално потврден.
ИДФ потенцира дека пред нападот биле преземени мерки за да се минимизираат цивилните жртви, вклучувајќи користење на прецизно оружје и искористување на дополнителни разузнавачки податоци.
„ИДФ и ИСА (Израелска безбедносна агенција) извршија прецизен напад насочен кон високото раководство на терористичката организација Хамас. Членовите на ова раководство со години ги водеа операциите на Хамас, беа директно одговорни за бруталниот масакр од 7 октомври и организираа и водеа војна против Државата Израел“, соопштија од ИДФ.
Во соопштението се наведува дека Израел ќе продолжи да дејствува решително за да го порази терористичкиот Хамас, кој стои зад насилството кон Израел.
