Американскиот претседател Доналд Трамп изјави дека Иран би можел со години да ги чувствува последиците од заедничките американско-израелски напади, оценувајќи дека земјата нема брзо да закрепне од нанесената штета. Во телефонски разговор со израелски новинар, Трамп посочил дека операцијата може да заврши за неколку дена, но и да продолжи подолго, во зависност од развојот на состојбата.
Според пренесените информации, тој порачал дека има можност кампањата да трае „два или три дена“ или значително подолго, додавајќи дека САД би можеле повторно да реагираат доколку Иран се обиде да ги обнови своите нуклеарни и ракетни капацитети. Во истата изјава, Трамп нагласил дека на иранскиот режим ќе му бидат потребни „неколку години“ за да се опорави од ударите.
Трамп воедно го обвини Техеран дека се повлекол од можноста за сериозен нуклеарен договор, оценувајќи дека иранската страна не покажала вистинска подготвеност за компромис. Тој го опишал и разговорот со израелскиот премиер Бенјамин Нетанјаху како позитивен, во момент кога тензиите на Блискиот Исток дополнително се зголемуваат.
Изјавата доаѓа во време на нова ескалација меѓу САД, Израел и Иран, по нападите врз ирански цели и последователните одговори од Техеран.
