Голем скандал ја тресе индустријата на таканаречените „пазари на предвидувања“, откако платформа за обложување одбила да исплати десетици милиони долари на корисници кои мислеле дека погодиле огромна добивка.
Според извештаите, бројни корисници на платформата „Калши“ се обложиле дека иранскиот врховен лидер, ајатолахот Али Хамнеи, ќе биде „соборен“ од функцијата. Меѓу нив бил и американско-израелски бизнис директор кој вложил 3.460 долари, а очекувал исплата од над 63.000 долари.
Но, иако се појавиле зелени ознаки што укажувале дека прогнозата е точна, компанијата подоцна одбила да исплати добивки во вкупна вредност од околу 54 милиони долари.
Образложението било дека смртта на лидерот не се смета за „соборување“ од функцијата, а правилата на платформата не дозволуваат облози кои директно зависат од нечија смрт. Оваа интерпретација на правилата предизвика бурни реакции бидејќи обложувањето било дозволено и привлекло милиони долари пред да се донесе конечната одлука.
Некои од обложувачите реагираа гневно на интернет. Еден инвеститор на социјалната мрежа Икс напиша дека се откажува од ваквите пазари бидејќи, според него, компанијата им должи илјадници долари на многу луѓе.
Критики стигнаа и од политичари. Американскиот сенатор Крис Марфи изјави дека ваквите платформи претставуваат „комерцијална неморалност на стероиди“, додавајќи дека е проблематично кога трагични или морални прашања се претвораат во финансиски обложувања.
Иако платформата наводно ги вратила вложените средства на корисниците, многумина останале разочарани бидејќи очекувале огромни добивки. Случајот повторно отвори дебата: дали обложувањето на вакви настани треба воопшто да постои?
