Поранешниот висок функционер на „JPMorgan Chase“, Џес Стејли, пред американските пратеници признал дека на Џефри Епстин му споделувал доверливи банкарски информации. Ова произлегува од транскриптот од неговото сведочење пред Надзорниот одбор на Претставничкиот дом на американскиот Конгрес.
Стејли сведочел во јули во рамките на истрагата поврзана со Џефри Епстин и неговата соработничка Гислен Максвел. Транскриптите од сослушувањето на 69-годишниот банкар беа објавени во средата, а деталите од неговото сведочење ги пренесоа американските медиуми, меѓу кои и „Ројтерс“.
Во текот на сведочењето, Стејли потврдил дека му давал на Епстин информации поврзани со комуникацијата на „JPMorgan“ со Федералниот резервен систем на САД, познат како ФЕД, во периодот на големата финансиска криза во 2008 година.
Епстин, кој со години имал контакти со луѓе од високите политички, академски и финансиски кругови, бил клиент на „JPMorgan“. Подоцна стана познат по сериозните сексуални кривични дела за кои беше обвинет и осуден.
„Верував дека имам овластување“
Стејли пред конгресниот одбор објаснил дека во тоа време верувал оти имал овластување да споделува одредени информации кога сметал дека тоа е соодветно.
Тој истакнал и дека со Епстин имал близок професионален однос. Стејли тврдел дека не бил свесен за неговите криминални активности и дека не знаел за злосторствата што подоцна излегоа во јавноста.
Во сведочењето биле опфатени и други информации за односот меѓу двајцата. Стејли признал дека го известил Епстин за загриженоста што постоела во банката поради неговите големи подигнувања готовина.
Дополнително, тој му кажал на Епстин дека банката го сметала за клиент со висок ризик. Тоа покажува дека во „JPMorgan“ постоеле одредени финансиски и безбедносни сомнежи во врска со неговото работење и трансакциите, иако Стејли сепак продолжил да комуницира со него.
Џес Стејли поминал повеќе од три децении во „JPMorgan Chase“, каде што извршувал неколку значајни функции. Меѓу другото, бил на чело на одделот за приватно банкарство и управување со богатство, што го ставало во позиција да има пристап до високо чувствителни финансиски информации.
Подоцна ја продолжил кариерата надвор од „JPMorgan“, а од 2015 до 2021 година беше главен извршен директор на британската банка „Barclays“.
Неговото сведочење сега е дел од пошироката конгресна истрага која се обидува да ги разјасни врските на Епстин со финансискиот свет и начинот на кој неговите контакти со влијателни луѓе му овозможувале пристап до различни институции и лица.
Особено внимание привлекува признанието дека на Епстин му биле пренесувани информации поврзани со банкарски комуникации и дека бил информиран за загриженоста околу неговите финансиски активности. Токму овие детали се очекува да бидат предмет на дополнително разгледување во рамките на истрагата.
