Американскиот државен секретар Марко Рубио откри дека САД се вклучиле во воени операции против Иран откако процениле дека нападот од Израел бил неизбежен и дека тоа ќе предизвика одмазднички удари врз американските сили во регионот.
„Беше јасно дека ако Иран биде нападнат од кој било – САД, Израел или некој друг – тие ќе одговорат против САД. Знаевме дека ќе има израелска акција и дека тоа ќе предизвика напад врз американските сили. Ако не реагираме превентивно, ќе претрпиме поголеми жртви“, изјави Рубио.
Од почетокот на нападите врз Иран загинале најмалку шест американски војници, а 18 се повредени. САД и Израел извршија повеќе воздушни напади врз цели во Иран, на што Техеран возврати со напади во неколку земји на Блискиот Исток.
Потпретседателот Џеј-Ди Венс изјави дека главната цел на Вашингтон е да се спречи Иран да развие нуклеарно оружје и дека претседателот сака јасно да стави до знаење дека нема да се смири додека не ја постигне таа цел.
Од демократскиот табор следуваа остри критики, а лидерот на малцинство во Сенатот, Чак Шумер, рече: „Ова е војната на Трамп. Тој нема стратегија, нема крајна цел.“
Ескалацијата го зголемува притисокот врз американската администрација, додека меѓународната заедница повикува на дипломатско смирување и избегнување на понатамошна дестабилизација на регионот.
