Кина очекуваше нови царини од САД и веројатно се подготвуваше за нив, но последниот бран на тарифи ќе има значително влијание на кинеската економија, што не може да се ублажи со ниту едно ниво на подготовка, пишува дописникот за Азија на „Скајњуз“ од Пекинг.
„Кога ќе се соберат сите царини кои беа воведени оваа година, заедно со оние кои се уште се на сила од првиот мандат на Трамп, сите кинески производи сега се оптоварени со повеќе од 50% увозни давачки, а некои може да достигнат и 70%. Во практика, такви нивоа на тарифи ја прават трговијата со Америка речиси невозможна за поголемиот дел од кинеските компании“, се истакнува во извештајот на „Скајњуз“.
Имајќи предвид дека извозот претставува околу 20% од кинескиот БДП, а трговијата со САД чини околу 15% од тој извоз, влијанието на економијата ќе биде огромно и широко распространето.
Експертите веќе предвидуваат губење на милиони работни места, пад на многу мали бизниси кои ги сочинуваат комплексните синџири на снабдување во Кина, и многу е веројатно дека земјата нема да успее да ја достигне целта за раст на БДП од околу 5%, пишува „Скајњуз“.
