Италијанската премиерка Џорџа Мелони повторно истакна дека Италија ќе ја поддржува Украина во нејзината одбрана од руската агресија. Таа нагласи дека Москва не покажува намера да учествува во мировни преговори и дека интензивните напади врз Киев само ја потврдуваат оваа реалност.
„Интензивните напади од синоќа врз Киев јасно покажуваат кој е на страната на мирот, а кој не верува во преговарачкиот процес“, напиша Мелони на својата објава на платформата X.
Премиерката го изрази своето сочувство и поддршка за украинскиот народ, посебно за цивилите и семејствата кои ги загубиле своите најблиски во последните напади. Според извештаи, најмалку 17 лица, меѓу кои и четири деца, загинале во руските бомбардирања на украинската престолнина.
Мелони подвлече дека Италија нема да ја намали својата поддршка за Украина, како на политички така и на дипломатски и хуманитарен план, во обид да се заштити цивилното население и да се промовира траен мир во регионот.
