Глобалниот воздушен сообраќај влезе во сериозна криза откако конфликтот на Блискиот Исток предизвика затворање и силни ограничувања на клучниот воздушен простор во регионот. Илјадници летови беа откажани, а патници останаа блокирани на аеродроми низ Европа, Азија и Блискиот Исток, додека авиокомпаниите се обидуваат да најдат алтернативни рути и да го стабилизираат распоредот.
Најголем удар претрпеа главните транзитни центри во Заливот, вклучително и Дубаи, Абу Даби и Доха, кои беа затворени или силно ограничени. Ројтерс објави дека само во неделата околу 4.000 летови требало да пристигнат во регионот, а прекинот на сообраќајот оставил десетици илјади патници заглавени ширум светот. Во Обединетите Арапски Емирати, властите помогнале на повеќе од 20.000 патници само во саботата.
Според Flightradar24, целосно затворен или сериозно ограничен беше воздушниот простор над Иран, Ирак, Кувајт, Бахреин и Катар, додека и во Обединетите Арапски Емирати имаше безбедносни ограничувања што практично го парализираа комерцијалниот сообраќај. Овие затворања веќе беа продолжувани, што покажува дека проблемот не е краткотраен и дека нормализацијата нема да биде брза.
Дополнителен проблем е што екипажите и авионите се расфрлани на различни дестинации, па дури и по повторното отворање на дел од небото, авиокомпаниите ќе имаат проблем веднаш да го вратат редовниот распоред. Ројтерс наведува дека покрај откажувањата, нов удар врз секторот се и повисоките цени на нафтата, што веднаш ги турна надолу акциите на авиокомпаниите низ светот.
Ако кризата продолжи, последиците нема да се почувствуваат само преку доцнења и откажувања, туку и преку поскапи билети, нарушен туризам и поскап транспорт на глобално ниво.
