Американски и руски претставници се очекува да одржат разговори за војната во Украина овој викенд во Мајами, како дел од обидите на администрацијата на претседателот Доналд Трамп да стави крај на конфликтот кој трае речиси четири години, пренесува „Политико“, повикувајќи се на извори запознаени со процесот.
По неуспешните досегашни напори за целосно прекинување на борбите, Вашингтон го засили притисокот врз Киев да прифати одредени отстапки со цел да се постигне договор со Москва, објавува „Телеграф“. Според изворите, плановите сè уште се предмет на промени, но доколку средбата се одржи, американската страна ќе ги претстави резултатите од последната рунда разговори, иако руските барања досега не покажале значителни отстапки.
Се очекува во руската делегација да биде вклучен и Кирил Дмитриев, шеф на рускиот суверен фонд за богатство. Изворите инсистираат на анонимност поради чувствителноста на разговорите. Американската страна, пак, се очекува да ја претставуваат специјалниот пратеник на Трамп, Стив Виткоф, како и зетот на претседателот, Џаред Кушнер.
Виткоф и Кушнер неодамна одржаа интензивни разговори во Берлин со украински и европски претставници, каде се дискутирало за безбедносни гаранции за Украина, можни територијални компромиси и идната улога на САД, додека Вашингтон продолжува да врши дипломатски притисок врз Киев.
Според информациите, САД понудиле заемна одбранбена обврска слична на онаа што важи за членките на НАТО, додека Украина привремено се откажала од барањето за итно приклучување кон Алијансата. Во американската администрација постои уверување дека Русија би можела да ги прифати западните безбедносни гаранции и членството на Украина во Европската унија како дел од конечен договор.
Сепак, рускиот претседател Владимир Путин не покажа знаци на отстапување од своите позиции. Во обраќање пред високи воени функционери во Москва, тој изјави дека Русија нема намера да се откаже од, како што ја нарече, својата мисија за „ослободување на историските територии“, истовремено остро критикувајќи ја Европа поради поддршката за Киев.
САД најавија и можност за свикување состанок на воени претставници од земјите што ја поддржуваат Украина, со цел да се разработат техничките детали околу безбедноста и територијалните прашања. Разговорите во Мајами, според изворите, би се воделе паралелно и како одвоен дипломатски канал.
Исто така, се очекува украинскиот советник за национална безбедност Рустем Умеров да оствари средба со американската делегација пред разговорите меѓу САД и Русија, иако деталите околу агендата сè уште не се целосно утврдени.
Во меѓувреме, европските лидери интензивно работат на планови за безбедносни гаранции за Украина, вклучувајќи предлог за демилитаризирана зона долж актуелните линии на фронтот, како и распоредување трупи кои би обучувале украински сили и би го надгледувале евентуалниот прекин на огнот. Според еден европски функционер, дел од коалициските сили би управувале со авиони и беспилотни летала за надзор, додека други би биле стационирани во западна Украина со цел да помогнат во обновата на воените капацитети, а не директно да учествуваат на фронтот.
