Централната команда на американската војска (CENTCOM) соопшти денеска дека американските сили извеле „напади за самоодбрана“, кои биле насочени кон местата за лансирање ракети на југот на Иран и кон чамците околу Ормускиот Проток. – Американските сили денеска изведоа напади во самоодбрана на југот на Иран за да ги заштитат нашите трупи од заканите што ги претставуваат иранските сили – изјави портпаролот на CENTCOM, Тимоти Хокинс, за CNN во соопштение, како одговор на прашањето да ги коментира експлозиите кои се случија околу Ормускиот Проток.
Америка изведе нови удари врз Иран
Тој изјави дека меѓу целите на американската војска биле „места за лансирање ракети и ирански чамци кои се обидувале да постават мини“.
– Централната команда на Соединетите Американски Држави продолжува да ги брани нашите сили, користејќи воздржаност за време на тековното примирје – додаде Хокинс.
Американските и иранските сили и претходно за време на примирјето, кое стапи на сила на 8 април, разменуваа оган. На почетокот на мај, американските сили ги гаѓаа иранските воени објекти за кои наведоа дека се одговорни за покренување на низа „со ништо непредизвикани“ напади со ракети, дронови и мали чамци врз американските воени бродови кои минуваа низ протокот.
Американскиот претседател Доналд Трамп претходно ги овласти американските сили да одговорат на иранските провокации околу Ормускиот Проток, кој е клучен пловен пат за транспорт на околу една петтина од нафтата и течниот природен гас на меѓународно ниво.
Нетанјаху: На израелската војска ѝ е наложено да ги засили нападите врз Хезболах
Премиерот на Израел, Бенјамин Нетанјаху, изјави дека ѝ наложил на Израелските одбранбени сили да ги интензивираат нападите, односно „уште посилно да го притиснат гасот“ во операциите против либанското милитантно движење Хезболах.
Нетанјаху во видеообраќањето доцна во понеделникот наведе дека Израел е во војна со Хезболах и дека израелските сили во последните недели елиминирале повеќе од 600 припадници на таа група, пренесува Тајмс оф Израел.
„Ние сме во војна со Хезболах. Само во последните недели нашите храбри борци елиминираа повеќе од 600 терористи“, рече Нетанјаху.
Во израелските воздушни напади врз градот Машгара во западната долина Бека во источен Либан, во текот на изминатата ноќ загинаа повеќе лица, пренесува весникот Ал Араби ал Џадид.
