По масовниот комбиниран напад на Русија врз Киев, во кој беа погодени цивилни цели и самата Делегација на Европската Унија во Украина, претседателката на Европската комисија, Урсула фон дер Лајен, упати остри пораки до Москва. Таа нагласи дека е крајно време рускиот претседател Владимир Путин да седне на преговарачка маса и да отвори пат кон праведен и траен мир.
Фон дер Лајен денес имала телефонски разговори со украинскиот претседател Володимир Зеленски и американскиот претседател Доналд Трамп. Во објавата на платформата X таа потврди дека внимателно ја следи ситуацијата по нападите, нагласувајќи дека заедничката европска канцеларија во Киев, исто како и многу цивилни објекти, била директно погодена.
„Путин мора да седне на преговарачка маса. Само со вистински и долготрајни гаранции за безбедност може да се обезбеди стабилен мир за Украина“, порача шефицата на Европската комисија.
Фон дер Лајен додаде дека Европа нема да остане нем набљудувач и дека „ќе ја одигра својата целосна улога“. Таа го спомена и новиот европски одбранбен инструмент SAFE, кој според неа ќе биде клучен за дополнително јакнење на украинските вооружени сили во борбата против руската агресија.
Во своето обраќање таа потсети и на човечките жртви – според последните податоци во руските напади врз Киев загинале најмалку 18 лица, меѓу нив и четири деца. „Овие трагедии нема да ја скршат Украина, туку уште повеќе ќе го зацврстат европското единство и непоколебливоста на украинскиот народ“, истакна фон дер Лајен.
