Лионел Меси планираше да ја искористи четиримесечната пауза од МЛС за да остане во врвна форма пред Светското првенство, но неговата идеја не наиде на одобрување во Саудиска Арабија. Според францускиот RMC Sport, аргентинската ѕвезда сакала да потпише краткорочен договор со некој од клубовите од Саудиската професионална лига во зимскиот период, со цел да не ја изгуби физичката подготвеност и натпреварувачкиот ритам.
Сепак, саудиските власти и клубови експресно го одбиле предлогот. Причината – лигата не сака да биде „привремена станица“ за светските фудбалски имиња, туку се стреми да изгради долгорочно, стабилно и конкурентно првенство кое ќе биде рамноправен ривал на најсилните европски лиги.
Ова одбивање, иако изненадувачко за многумина, се смета за принципиелен потег на Саудијците – порака дека повеќе нема да бидат „тренинг полигон“ за ѕвезди во завршните години од кариерата, па дури ни за еден од најдобрите фудбалери на сите времиња.
Меси, кој веќе две години настапува за Интер Мајами, има импресивен биланс – 73 голови и 37 асистенции на 83 натпревари. Тој неодамна го продолжи договорот со клубот до 2028 година, кога ќе има 41 година. И покрај возраста, неговата пазарна вредност останува околу 18 милиони евра, бројка што говори за неговото влијание и квалитет.
Одлуката на Саудијците доаѓа во период кога државата масовно инвестира во спортот и веќе успеа да донесе ѕвезди како Кристијано Роналдо и Карим Бензема. Но, очигледно, Лионел Меси е исклучок од таа стратегија.
И покрај сè, Меси не се откажува – решен е да ја одржи својата форма и да биде подготвен за веројатно последното Светско првенство во неговата кариера, кое ќе се одржи во Канада, САД и Мексико во 2026 година.
