Српскиот тенисер Новак Ѓоковиќ успеа да обезбеди место во осминафиналето на Отвореното првенство на Австралија, откако денес во Мелбурн го победи 75-от играч во светот, Холанѓанецот Ботик ван де Зандшулп, со резултат 6:3, 6:4, 7:6 по два часа и 46 минути интензивна игра.
Ѓоковиќ започна силно, освојувајќи го првиот сет со брејк во четвртиот гем, додека вториот сет го отвори со водство од 3:0, благодарение на брејкови во првиот и третиот гем. Холанѓанецот потоа побара медицински тајм-аут поради проблем со десното рамо, а во следниот гем му го одзеде сервисот на Ѓоковиќ. Сепак, првиот носител на турнирот го затвори вториот сет со 6:4.
Третиот сет донесе вистинска драма: Ван де Зандшулп беше подобар во почетокот и поведе со 3:1 откако Ѓоковиќ малку го извитка десниот глужд, па мораше да побара медицински тајм-аут. Србинот возврати со брејк во петтиот гем и одбрани два сервиси во клучните моменти кога заостануваше со 4:5 и 5:6, за на крајот да слави со 7:4 во тај-брејкот.
Денешниот натпревар беше и сервис шоу: Ѓоковиќ реализираше 11 асови, додека Ван де Зандшулп заврши со 15 асови.
Во осминафиналето, Ѓоковиќ ќе се соочи со победникот од дуелот помеѓу 17-тиот на светската ранг-листа, Чехот Јакуб Меншик, и 80-тиот Американец, Итан Квин.
