Во центарот на Скопје денеска започна голем протест на плоштадот „Скендербег“ во поддршка на поранешните команданти на Ослободителната војска на Косово, кои пред Специјализираните совети во Хаг се соочуваат со обвиненија за воени злосторства. Организатор на собирот е лидерот на ДУИ, Али Ахмети, а присутни се поддржувачи од повеќе градови во земјата и делегации од Косово.
Од раните попладневни часови сообраќајот низ центарот на Скопје беше сериозно отежнат. Колони возила од Чаир, Бутел и Сарај се слеваа кон плоштадот, додека полициски кордони го регулираа движењето на граѓаните и возилата. Присутните носеа знамиња на Албанија и Косово, фотографии од обвинетите и транспаренти со пораки за поддршка, создавајќи атмосфера која наликува на политички митинг.
Ахмети го најави протестот како „национална должност“ и во своето обраќање ги опиша поранешните команданти како „борци за слобода“, додавајќи дека процесот против нив претставува неправда која ја навредува „целата албанска заедница во регионот“. На собирот присуствуваа и официјални претставници од Косово, вклучувајќи градоначалници и поранешни соборци на обвинетите.
Протестот се одржува во чувствителен политички момент за државата, во период кога ДУИ го засилува националниот наратив, додека власта се соочува со критики за корупција, економски состојби и застој во европските интеграции. Дел од аналитичарите предупредуваат дека ваквиот притисок врз Хаг може да ја продлабочи политичката поларизација, особено ако протестите продолжат или ескалираат.
Присуството на значителни полициски сили и дронови што го надлетуваат плоштадот покажува дека институциите ги преземаат сите мерки за спречување на можни инциденти. Засега протестот поминува мирно, но блокадите во централното подрачје и зголеменото присуство на демонстранти создаваат значителни потешкотии во движењето низ градот.
Организаторите најавија дека протестите ќе продолжат и во вечерните часови, како и дека ќе следуваат нови собири доколку, како што велат, „неправдата против командантите“ продолжи.
