Градоначалникот на Општина Битола, д-р Тони Коњановски, ја посети средното училиште „Таки Даскало“, каде што заедно со директорот Ристо Грујовски разговараше за реализацијата на крупните инфраструктурни проекти кои се поддржани од општината.
Еден од најзначајните проекти е изградбата на фотоволтаична централа со јачина од 40 kW, поставена на покривот на училиштето. Со инвестиција од 1.876.251 денари, училиштето сега целосно ги задоволува своите потреби за електрична енергија, а вишокот произведена струја се продава на компанијата „Енерџи он“ од Скопје.
„Овој проект носи не само финансиски придобивки, туку и енергетска ефикасност и заштита на животната средина, бидејќи училиштето користи обновливи извори на енергија“, изјави директорот Грујовски.
Освен оваа инвестиција, општината обезбеди нова информатичка и видео опрема во вредност од 408.870 денари, 19 телевизори, 18 персонални компјутери, смарт табла во вредност од 448.629 денари, како и нов училишен мебел од 285.914 денари. Со овие вложувања значително се подобруваат условите за учење и наставниот процес.
„Поддршката на образовните институции ќе продолжи и во иднина. Наш приоритет е создавање на современи услови за учениците и наставниот кадар“, истакна градоначалникот Коњановски.
Во наредниот период, планирани се уште два големи инфраструктурни проекти – замена на внатрешните врати во училниците и промена на електричната инсталација во училиштето.
