Националниот парк Шар Планина известува дека на територијата на паркот е присутна висока лавинска опасност, особено над 1700 метри надморска височина.
Зголемената опасност е предизвикана од комбинација на температурни промени, силен ветер и снежни врнежи во изминатите денови, што заедно со теренските карактеристики создава нестабилна снежна покривка и можност за лавини.
По дојава од операторот за слободно скијање „Ескимо спорт“, теренски екипи извршија увид и утврдија дека лавината поминала без човечки жртви и дека нема лица затрупани со лавински уреди. Експертите ја проценија стабилноста на снежната покривка со висок степен на лавинска опасност – 4 од 5 според европската скала.
Апел на Паркот:
- Избегнувајте движење во потенцијални лавински зони.
- Не се движете во повисоките делови без придружба на квалификувани лица.
- Пријавувајте ја вашата посета преку официјалната веб-страница на паркот.
Стручните служби континуирано ја следат состојбата и ќе информираат за сите промени. Зимските убавини на Шар Планина се извонредни, но бараат одговорност, информираност и строго почитување на безбедносните правила. Личната безбедност треба да биде на прво место.
