Основното јавно обвинителство во Битола, во координација со Истражниот центар при обвинителството и СВР Битола, откри добро организирана шема на измами преку лажни сообраќајни несреќи. Според информациите од истрагата, во последните два до три месеци повеќе од десет граѓани од битолскиот регион биле измамени, а вкупната штета надминува 60.000 евра, покрај златен накит и други вредни предмети.
Надлежните посочуваат дека бројот на вакви случаи особено се зголемил од почетокот на февруари, кога биле регистрирани најмалку шест слични измами.
Начинот на кој делувале измамниците бил речиси идентичен во сите случаи. Најчесто мета биле повозрасни граѓани кои добивале телефонски повик во кој им било кажувано дека нивен близок роднина е тешко повреден во сообраќајна несреќа и дека итно се потребни пари за сложена медицинска операција.
Во друга верзија на измамата, сторителите им соопштувале на жртвите дека нивен роднина предизвикал тешка сообраќајна несреќа и дека, за да се избегне затворска казна, потребно е веднаш да се плати одредена сума пари.
Исплашени и загрижени за своите најблиски, граѓаните прифаќале да предадат пари во готово на лица кои воопшто не ги познавале. Износите варирале од неколку десетици илјади денари до над 20.000 евра, а во некои случаи жртвите предавале и златен накит и други вредни предмети.
Парите и предметите најчесто се предавале на различни локации во Битола, на лица кои претходно биле ангажирани преку огласи на Фејсбук за привремена работа. Овие лица ја имале улогата директно да ги подигнат средствата од измамените граѓани.
До овој момент Основното јавно обвинителство Битола поднесе обвинение против четири лица кои се сомничат дека учествувале како соизвршители во измамите и дека директно ги преземале парите од жртвите.
Според досегашните сознанија на истрагата, откако биле подигнати, парите потоа биле пренесувани и предавани на засега непознато лице во Бугарија. Истрагата открила и дека сите случаи се поврзани со телефонски броеви од Романија, преку кои измамниците стапувале во контакт со оштетените.
Поради овие меѓународни врски, Основното јавно обвинителство Битола веќе испратило барања за меѓународна правна помош до надлежните институции во овие држави, со цел да се преземат дополнителни истражни дејствија и да се откријат организаторите на измамничката мрежа.
Во меѓувреме, истражните органи упатуваат апел до граѓаните да бидат особено внимателни и да не наседнуваат на вакви телефонски измами. Надлежните предупредуваат дека никогаш не треба да се предаваат пари „на рака“ на непознати лица, особено кога станува збор за итни барања кои доаѓаат преку телефонски повик.
