Настапот на српската пејачка Светлана Ражнатовиќ во Велес предизвика бурни реакции во јавноста, особено по веењето на бугарското знаме на концертот.
Во интервју за српските медиуми, Цеца објасни дека знамето ѝ било фрлено од обожавателка и дека тоа го прават фановите во различни земји.
„Огромна чест ми е кога некој ми го дава знамето на својата земја. Го завиткав околу мене и одеднаш се слушнаа свирежи. Не знаев за што станува збор, бев целосно збунета“, рече Цеца.
Таа додаде дека не знаела дека постои толкаво непријателство меѓу земјите:
„Многу ми е жал ако повредив нечии чувства. Апсолутно не ми беше намера, бидејќи не се занимавам ниту со домашна, а камоли со соседска политика. Навистина се трудам да ширам само љубов преку мојата песна, и ова трае веќе 38 години“, изјави пејачката.
Цеца истакна дека на настапот во Велес се случил „вистински делириум“ кога го кренала македонското знаме и дека не сака никој да мисли дека тоа било политички мотивирано.
„Ги почитувам сите чувства кај луѓето – националното знаме, религијата и националноста. Барам моето да се почитува, бидејќи кога не го почитуваш своето, не знаеш како да го почитуваш туѓото“, порача Цеца.
