Meta подготвува голема промена што може засекогаш да го смени начинот на кој ги користиме Instagram, Facebook и WhatsApp. Компанијата започнува тестирање на нови премиум претплати, со кои корисниците ќе добијат напредни алатки и функции што досега не постоеле – или биле недостапни.
Ова нема врска со досегашната Meta Verified сина значка. Новиот модел оди чекор понатаму и нуди вистински „дигитални супермоќи“, главно потпирајќи се на вештачка интелигенција и детална анализа на профилите.
На Instagram, корисниците кои ќе платат би можеле конечно да видат кој ги отпратил, без користење сомнителни апликации. Се најавува и инкогнито режим – можност за гледање Stories без да се појави вашето име. Дополнително, се тестираат AI-алатки за автоматско креирање и напредно уредување видеа, што може целосно да го промени начинот на создавање содржина.
И WhatsApp, кој со години важеше за апликација без реклами и „скриени трошоци“, нема да остане ист. Meta планира премиум функции поврзани со поголема приватност, паметни AI-асистенти и полесна организација на разговорите.
Причината е очигледна – Meta сака директно да заработува од корисниците, следејќи го примерот на платформи како Snapchat+. Основните функции ќе останат бесплатни, но најмоќните алатки ќе бидат резервирани за оние што ќе платат.
Тестирањето почнува на ограничени пазари, а цената сè уште е тајна.
