Бројките за 2025 година отвораат прашања што ретко кој гласно ги поставува. Преку извршители биле присилно наплатени повеќе од 137 милиони евра – сума што повторно го става фокусот врз должниците, но и врз оние што стојат зад барањата за наплата.
Иако вкупната наплата е пониска во споредба со претходната година, податоците покажуваат изненадувачки пресврт кај граѓаните. За првпат, од физички лица се наплатени над 50 милиони евра во една година – историски највисок износ досега. Само за една година, товарот кај граѓаните пораснал за речиси четири милиони евра.
Компаниите остануваат на врвот и како најголеми должници и како најголеми доверители. Од нив се наплатени околу 63,5 милиони евра, додека преку истиот механизам успеале да повратат над 105 милиони евра. Државата, пак, се наоѓа на третата позиција и како должник и како доверител, но со значително пониски износи.
Вкупната реализација на барањата за присилна наплата изнесува околу 44 проценти – што значи дека повеќе од половина од побарувањата остануваат ненаплатени.
Во период од две децении, откако постои системот на извршување, се собрани над 2,22 милијарди евра. Највисоките износи биле регистрирани во неколку претходни години, но 2025 ќе остане запаметена по нешто друго – драматичниот скок кај наплатата од граѓаните.
Прашањето што останува е: дали ова е тренд што допрва ќе расте?
