Истанбул, 25 август 2025 – Јавноста во Истанбул е потресена од веста за смртта на двајца млади холандски државјани, тинејџери на возраст од 15 и 17 години, кои беа пронајдени мртви во хотелска соба во центарот на градот. Трагичниот настан се случил утрото на 25 август, околу 07:30 часот, а во собата со нив се наоѓал и нивниот татко (57), кој е хоспитализиран во тешка здравствена состојба.
Според првичните информации објавени од турските медиуми, момчињата претходната вечер вечерале во ресторан во областа Таксим, додека нивниот татко не учествувал во оброкот. Наредното утро, вработен во хотелот реагирал на повици за помош од собата, по што ги пронашол тинејџерите без знаци на живот – едниот на подот, другиот во креветот.
Екипите на Итната медицинска помош пристигнале веднаш, но не успеале да ги реанимираат момчињата. Таткото, кој бил во состојба на шок, е веднаш пренесен во болница, каде е задржан на лекување.
Иако точната причина за смртта сè уште не е утврдена, една од водечките хипотези која се разгледува е можноста за труење со храна. Турските истражни органи започнаа истрага, а обдукцијата ќе даде дополнителни одговори во наредните денови.
Од страна на холандското Министерство за надворешни работи е потврдено дека е започнат процес на конзуларна поддршка на семејството, како и комуникација со турските власти.
