Драматична ситуација се случила синоќа во стоматолошка ординација во Белград, каде 38-годишен маж доживеал сериозен здравствен инцидент за време на интервенција на умник.
Според информациите објавени од српските медиуми, на пациентот му се слошило во текот на стоматолошкиот зафат. Медицинскиот персонал веднаш започнал со мерки за кардиопулмонална реанимација, по што била повикана и Итна медицинска помош.
Екипа на Итната помош пристигнала за кратко време и ја продолжила реанимацијата на местото на настанот. По укажаната прва помош, пациентот бил итно транспортиран во Ургентен центар.
Но драмата не завршила тука. Според неофицијални информации, по приемот во болница повторно дошло до застој на срцевата работа, по што лекарите уште еднаш интервенирале со реанимација. Благодарение на брзата реакција, медицинскиот тим успеал да го стабилизира пациентот.
Тој е задржан на понатамошно лекување и детална дијагностика, а засега нема официјални информации за причините за ненадејното влошување на неговата здравствена состојба, ниту за неговата моментална состојба.
Надлежните институции треба да ги утврдат сите околности поврзани со настанот.
