„Не постојат граници каде можеме или не можеме да дејствуваме – било во окупираните подрачја или било каде во светот“
Една од најсмелите акции во војната во Украина ја изведе специјалната единица на украинската воена разузнавачка служба (ГУР). Сè започнало во раната зора, кога командоси на Украина се инфилтрирале длабоко зад руските линии во областа Суми, ги прекинале снабдувачките линии и ги уништиле командните центри во изненаден напад за кој, според Киев, резултирал со целосно уништување на една руска борбена единица и запирање на нејзиното напредување.
Украинската воена разузнавачка служба соопшти дека при нападот биле убиени најмалку 334 руски војници, а повеќе од 550 биле ранети.
Мисијата ја извела специјалната единица Тимур, елитна формација внатре во ГУР, специјализирана за тајни напади и заседи по копно и море.
Обично делуваат во сенка, но оваа единица е заслужна за некои од најсофистицираните и најзначајните операции во војната, а нејзините припадници стекнаа речиси легендарен статус во Украина.
Командант на единицата што кај Русите буди страв и ужас е полковникот Тимур, а по него Володимир Зеленски го нарекол и целиот состав.
Знаме на Крим и порака: „Можеме да се појавиме било каде“
На Денот на независноста на Украина, 24 август 2023 година, Тимур стана национален херој кога за првпат по речиси десет години руска окупација беше поставено украинското знаме на Кримскиот Полуостров.
Смелиот упад на полуостровот во Црно Море вклучувал патување со чамци, а потоа со џет-скии на растојание од 200 километри за да се упадне во руска база со моќен систем за електронско војување кој ги попречувал украинските ракети. И покрај судирите со руските сили, целта била погодена, а мисијата – со кодно име „Разбудување на силата“ – била оценета како голем воен успех.
Но можеби најважна била јасната порака: Русија е ранлива.
„Жителите на Крим видоа дека дојдовме, а Русите сфатија дека можеме да се појавиме било каде и во секое време“, изјави полковникот Тимур за таа операција.
Специјалци без граници: тајни мисии и психолошки удари
Специјалната единица Тимур е една од најголемите во рамките на ГУР. Иако точниот број на нејзините припадници не е познат, таа се состои од околу 20 помали формации високо специјализирани за нерегуларно војување.
Единиците Nobody и Raven се познати по напредна употреба на дронови по копно и море, додека единицата Bratstvo изведува амфибиски напади и саботажи на руска територија. Единицата Spectre 33 е специјализирана за борбено нуркање.
„Она што ја прави оваа единица уникатна е тоа што ги обединува различните формации со посебни вештини и обуки, дополнително засилени со искуство од современото војување“, вели Дмитро Жмајло, воено-политички експерт и извршен директор на Украинскиот центар за безбедност и соработка.
„Најверојатно ова е една од првите единици по Втората светска војна која успешно изведе длабоки упади со тајни мисии на територија под руска контрола.“
Од Бахмут и Змиски Остров до Африка
Единицата Тимур учествувала во некои од најкрвавите битки во војната – од одбраната на „патот на животот“ во Бахмут, до морално важни победи како ослободувањето на Змиски Остров во Црно Море и елиминацијата на руски платеници во Судан.
„Одлично се опремени со западно оружје, исклучително искусни на боиштето, високо мотивирани и неверојатно ефикасни“, изјави Иван Ступак, украински воен аналитичар и поранешен офицер на Службата за безбедност на Украина (СБУ).
Во областа Суми, нивната разновидност особено дошла до израз – покажале единствена способност за борба во ровови, шуми и од воздух.
Напади што го менуваат текот на војната
Русија претходно годинава ја нападна североисточната област Суми со цел создавање „зона на безбедност“ која би спречила украински упади преку границата.
ГУР во вторникот соопшти дека руското напредување било „целосно запрено“ кога специјалците на единицата Тимур упаднале во непријателските позиции и „поразиле“ стотици војници на Путин во блиски борби и воздушни напади.
Вкупно, според ГУР, биле убиени или ранети речиси 1000 руски војници. Видео компилација од нападите завршува со порака: „Вооружената борба продолжува! Слава на Украина!“
Иако не е наведен точниот датум и локација на битката, аналитичари и отворени извори укажуваат дека руските офанзивни операции во областа Суми престанале кон крајот на мај.
Во нападот учествувале и единиците Chymera, Yunger, Stugna, Сибирски баталјон, Aratta, 1514, Paragon, Art Division, First Line, Raven група и 6-та специјална оперативна единица – сите под водство на единицата Тимур.
Фронтот се шири – сè до Африка
Во мај, единицата изведе напад со хеликоптери во областа Харкив, комбинирајќи воздушни, артилериски и дрон напади, како и саботажи зад непријателските линии. Целта беше да се спречат руските обиди за преминување на реката Оскил – природна бариера кон стратешки важниот град Купјанск.
Според ГУР, погодени биле 600 руски подземни засолништа, девет складишта за муниција, осум премини преку реката, и убиени или ранети 439 руски војници.
Нивните храбри подвизи ги однеле и надвор од границите на Украина.
Во август 2023 година, 100 припадници – претежно од единицата Тимур – биле испратени во Судан за да помогнат во потиснување на бунтовниците поддржани од руската платеничка група Вагнер, од главниот град Картум, среде граѓанска војна во таа земја.
Продолжувајќи го боиштето помеѓу Украина и Русија сè до Африка, командосите ја обучувале суданската војска за борба со дронови и нови технологии, изведувале ноќни напади и помогнале во повторното освојување на територија.
Како и поставувањето на знамето на Крим, и оваа акција испрати јасна порака:
„Не постојат граници каде можеме или не можеме да дејствуваме – било во окупираните подрачја или било каде во светот“, изјави полковникот Тимур за „Украинска правда“ во февруари 2024 година.
„Каде и да се наоѓаат војници, офицери или поединци поврзани со руските специјални служби – ќе ги стигнеме“, додаде тој.
