Обединетите нации предупредуваат дека „безбедните зони“ што Израел ги прогласи на југот од Појасот Газа не обезбедуваат сигурност за Палестинците и ги нарекуваат „места на смртта“. Џејмс Елдер, портпарол на УНИЦЕФ, истакнува дека училиштата и шаторите, кои требало да служат како привремени засолништа, често се бомбардирани, а јужните области се густо населени и лишени од основни средства за преживување.
Израел ја прогласи областа Ал-Маваси за „безбедна зона“ и ги повика Палестинците да се преселат таму за хуманитарна помош и медицинска нега, но зоната постојано е погодена во воздушните напади, иако целта, според Израел, е Хамас. Елдер потсетува дека одговорноста за обезбедување на храна, засолниште и санитарни услови е на Израел како окупаторска сила, но овие услови не се исполнети, што ја претвора „безбедната зона“ во опасно место за живот.
