Украина ја погоди Русија во срцето: 93 дронови соборени, Москва и уште 9 региони под напад
Во една од најжестоките ноќни офанзиви досега, Украина изврши масовен напад со дронови врз Русија, целејќи најмалку 10 региони, меѓу кои и Московската област, како и Брјанск и Курск, кои се наоѓаат во близина на границата со Украина. Според соопштението на руското Министерство за одбрана, руската воздушна одбрана соборила најмалку 93 украински дронови.
Само над Московскиот регион биле пресретнати 19 дронови, а градоначалникот на Москва, Сергеј Собјанин, потврди дека спасувачки екипи се распоредени на неколку локации каде паднале остатоци од соборените летала. Засега нема информации за човечки жртви, но четири московски аеродроми беа привремено затворени, потврди воздухопловната агенција Росавијација.
Според украински извори, целта на нападите е да се наруши руската воена логистика, посебно во граничните региони што се користат за снабдување на руските сили во источна Украина. Се нагласува дека штетата врз руските цивили е далеку помала од онаа што Русија ѝ ја нанесува на Украина со секојдневните ракетни и дронски напади.
Иако официјален Киев не ја презема директно одговорноста, ваквите масовни удари стануваат сѐ почести и понапредни, што укажува на зголемена прецизност и технолошка еволуција на украинската одбрана.
Аналитичарите предупредуваат дека ваквите акции ја зголемуваат тензијата и може да бидат вовед во нова, поинтензивна фаза на војната.
