Русија ја зацврсти својата офанзива врз Киев со интензивни напади цела ноќ, користејќи хиперсонични ракети и дронови, во еден од најсилните удари врз украинската престолнина оваа година. Локалните власти потврдија дека најмалку едно лице загина, а уште 15 се повредени, меѓу кои и едно дете.
Нападот започнал нешто по 1 часот по полноќ, кога во небото над градот биле забележани првите дронови и силни експлозии. Ударите продолжувале во бранови со часови, а околу 7 часот наутро Русија испукала нова серија проектили, вклучувајќи ги и хиперсоничните „Кинжал“ ракети – една од најмоќните во арсеналот на Москва.
Штетата е регистрирана во најмалку шест делови на градот: Свјатошински, Дњипровски, Дарницки, Шевченковски и Соломенски реон. Во неколку висококатници целосно се уништени горните катови, а други објекти се оштетени на пониските нивоа. Избувнале најмалку шест пожари, кои пожарникарите со часови се обидувале да ги локализираат.
Спасувачките тимови работеа цела ноќ пребарувајќи ги урнатините. Телото на загинат маж било пронајдено во Свјатошинскиот дел на градот, додека осуммина повредени се хоспитализирани, меѓу нив и едно дете од Шевченковски реон.
По нападите, западниот дел на Киев останал без електрична енергија, додека на десниот брег на Дњепар е забележан намален притисок на водоснабдувањето. Во поширокиот регион, најмалку две лица се повредени, а во Бровари е оштетена деветкатница, додека семејни куќи и гаражи се уништени.
Русија редовно изведува масовни ракетни и дрон-напади врз украинските градови, таргетирајќи цивилна инфраструктура. Само пред неколку дена, сличен напад врз Киев однесе седум животи и повреди околу 20 лица.
