Вселенската компанија Blue Origin на милијардерот Џеф Безос направи историски чекор и стана директен конкурент на SpaceX на Илон Маск, по успешното второ лансирање на најмоќната ракета New Glenn.
На 13 ноември 2025 година, ракетата беше успешно лансирана од вселенската станица Кејп Канаверал во Флорида, носејќи ги двете научни летала на НАСА – ESCAPADE (Escape and Plasma Acceleration and Dynamics Explorers). Тие прво ќе влезат во орбита околу Земјата, а потоа ќе продолжат кон Марс.
Првата фаза на New Glenn ги исклучи седумте BE-4 мотори и се одвои од горната фаза нешто повеќе од три минути по полетувањето. Потоа направи обид за слетување на платформата „Џеклин“ во Атлантскиот океан.
Во тој момент на повисоката фаза се активираа два мотори BE-3U, кои ја подигнаа ракетата во вселената. По одвојувањето на заштитниот штит, двете вселенски летала беа успешно распоредени и се упатија кон точката Лагранж 2 каде што ќе престојуваат до крајот на 2026 година – период кога Земјата и Марс ќе бидат во идеална позиција за меѓупланетарен пат.
Според планот на НАСА и Blue Origin, ESCAPADE мисијата ќе пристигне во орбитата на Марс во септември 2027 година. Таму ќе ја анализира атмосферата, ќе го мери нивото на зрачење и ќе собира критични податоци за идните човечки мисии кон Црвената планета.
Освен сателитите на НАСА, лансирањето носеше и секундарен комуникациски товар од компанијата Viasat, кој ќе служи за тестирање на нови комуникациски технологии за програмата за вселенски комуникациски услуги на НАСА. Тој останува прикачен на горниот дел од ракетата.
По лансирањето, контролата на мисијата привремено ја презеде Rocket Lab од Лонг Бич, Калифорнија, а подоцна управувањето ќе биде префрлено на Универзитетот во Беркли.
Овој успешен лет се смета за една од најзначајните пресвртници за Blue Origin и го означува почетокот на нова вселенска трка меѓу технолошките гиганти.
