Украина објави дека успешно погодила и запалила два руски танкери што наводно се користеле за транспорт на нафта со цел да се заобиколат западните санкции. Нападот бил изведен со поморски дронови во Црното Море, а операцијата, според украинските извори, била спроведена од страна на Украинската безбедносна служба (СБУ) во соработка со украинската морнарица.
Информациите за нападот ги потврдија и турските власти, кои соопштија дека се забележани експлозии на двата руски брода во сенка во близина на Босфор. По ударот, танкерите се запалиле.
Според деталите објавени од СБУ, нападнатите бродови, „Каирос“ и „Вират“, биле празни и се движеле кон пристаништето во рускиот град Новоросијск, каде што се наоѓа еден од најголемите нафтени терминали во регионот.
Од украинската служба наведуваат дека видеоматеријалот од операцијата покажува како двата танкера по ударот претрпеле тешки и непоправливи оштетувања, по што биле трајно ставени надвор од употреба. Според проценките, оваа акција може да нанесе сериозен економски удар врз рускиот систем за транспорт на нафта и да го наруши нелегалниот извоз што Русија наводно го користи како алтернатива по санкциите.
