Довчерашниот шеф на кабинетот на украинскиот претседател Володимир Зеленски, Андриј Јермак, објави дека ќе замине на фронт и ќе се бори за Украина откако поднесе оставка среде големиот корупциски скандал што ја потресе земјата. Јермак, кој важеше за вториот највлијателен човек во Украина, се повлече неколку часа откако антикорупциските агенции извршија претрес во неговиот дом, иако против него не се покренати обвиненија.
„Ме осквернавија, а моето достоинство не е заштитено. Затоа, не сакам да му правам проблеми на Зеленски, одам на фронт“, изјави Јермак за „Њујорк пост“.
Тој се најде под силен притисок поради корупцискиот скандал во енергетскиот сектор во земјата. Двајца министри беа сменети по откривањето на шема од 100 милиони долари, раководена од некогашниот деловен партнер на Зеленски, Тимур Миндич, кој избегал од Украина.
„Згрозен сум од валканите зборови упатени кон мене, а уште повеќе од недостигот на поддршка од оние кои ја знаат вистината. Можеби повторно ќе се видиме“, додаде Јермак.
Тој беше главен украински преговарач во актуелните мировни разговори со САД, а на негово место Зеленски го назначи Рустем Умеров, секретар на Советот за национална безбедност и одбрана.
