Во голема полициска акција во Венеција, италијанските карабинери разбија добро организирана мрежа џебџии, која со месеци тероризирала туристите во најпрометните делови на градот.
Уапсени се 23 лица, главно државјанки на Босна и Херцеговина, најмлади од 27 години. Акцијата е резултат на повеќемесечен надзор и следење на нивните активности, а по апсењата, истражната судијка издаде соодветни забрани.
Според италијанските медиуми, поединечни членки на групата заработувале и до 2.500 евра дневно – сума што ги надминува примањата на многу професионални фудбалери во Серија А. Документацијата од истрагата потврдува најмалку 32 кражби со плен од околу 50.000 евра, а реалниот број на криминални активности се проценува дека е многу поголем.
Посебно загрижува фактот што во кражбите учествувале и малолетнички, некои дури и под 14 години. Карабинерите истакнуваат дека групата имала строга внатрешна хиерархија, користела застрашување и физичко насилство за да ги принуди членовите да крадат.
Обвиненијата опфаќаат широк спектар на кривични дела, од тешки кражби и прикривање до перење пари и фалсификување картички. Истражителите нагласуваат дека улиците на Венеција биле секојдневно мета на нивните криминални активности.
