Американскиот претседател Доналд Трамп, според пишувањето на британскиот „Телеграф“, подготвува драматичен дипломатски потег што може да го промени текот на војната во Украина. Според информациите, Трамп е подготвен официјално да ги признае окупираните украински територии како дел од Русија, со цел да стави крај на конфликтот што трае со години.
Овој предлог ќе биде пренесен лично до рускиот претседател Владимир Путин од страна на специјалниот пратеник на Трамп, Стив Виткоф, кој треба да се сретне со него за да го презентира планот. Според дипломатски извори, оваа идеја е длабоко контроверзна, бидејќи директно се коси со долгогодишната американска надворешна политика и меѓународните конвенции.
Украина и нејзините европски сојузници остро се спротивставуваат на можноста за какви било територијални отстапки. Според дипломатски извор, ставот на САД е недвосмислен: „Европјаните нека прават што сакаат“.
Според овие информации, Трамп уште порано му поставил краен рок на украинскиот претседател Володимир Зеленски да го прифати американскиот мировен план. Планот првично содржел 28 точки, меѓу кои биле услови Украина да се откаже од членството во НАТО и да ги повлече трупите од дел од териториите што се предмет на спор. Девет точки од документот биле отстранети по ревизија, но суштината на условите останала иста.
Иако се најавуваат нови разговори меѓу Трамп и Зеленски, точниот датум за средбата засега не е познат, а во меѓународната јавност расте неизвесност околу тоа дали овој план ќе донесе мир или дополнителни тензии.
