Бројот на мигранти што пристигнуваат на Балеарските Острови во Шпанија забележа значително зголемување во изминатиот месец. Само во последните два дена, на островите пристигнале 19 бродови со околу 360 лица, соопштија шпанските власти.
Пристигнувањата преку западната медитеранска рута, главно на бродови од Алжир, се зголемиле за 27% помеѓу јануари и октомври во споредба со истиот период минатата година, објави „Ројтерс“.
Интересно е што ова зголемување се случува во време кога вкупните пристигнувања во Европската Унија се намалени за 22%, според податоците на граничната агенција на ЕУ, Фронтекс.
Портпаролот на Фронтекс, Крис Боровски, посочува дека шверцерите на мигранти ги префрлаат своите операции од Мароко во Алжир, каде контролите се помалку строги, а Балеарските Острови се нивна главна дестинација.
Според последните податоци, Алжир учествува со 75% од мигрантите што ја користат западната медитеранска рута. Шпанските власти информираат дека од почетокот на годината до октомври, на Балеарските Острови пристигнале вкупно 6.280 мигранти.
