Американската Служба за државјанство и имиграција (USCIS) донесе одлука да ги стопира сите процеси за азил, само два дена по вооружениот напад во близина на Белата куќа во кој загина 20-годишната припадничка на Националната гарда, Сара Бекстрам. Директорот на USCIS, Џозеф Едлоу, истакна дека суспензијата ќе трае додека не се обезбедат „највисоки безбедносни проверки“ за секој странски државјанин кој аплицира за престој во САД.
Дополнително, американскиот Стејт департмент ги замрзна сите визи за лица со авганистански пасоши, како што соопшти државниот секретар Марко Рубио. Претседателот Доналд Трамп исто така најави целосна забрана за прием во САД на лица од „земји од третиот свет“, без да ги наведе конкретните држави или рокот на примената на мерката.
Администрацијата соопшти дека ќе ги ревидира и сите зелени карти издадени на државјани од земји што претставуваат безбедносни ризици, меѓу кои Авганистан, Иран, Либија, Сомалија, Јемен, Куба, Венецуела и уште дванаесет други држави. Одлуките предизвикаа остри реакции од организации за човекови права, кои предупредуваат дека трагедијата се користи за политичко заострување на имиграциската политика.
Нападот се случи во среда, кога вооружен напаѓач, авганистански државјанин кој влегол во САД во 2021 година, отвори оган само неколку блокови од Белата куќа. Сара Бекстрам подоцна им подлегна на повредите, додека вториот гардист останува во критична состојба. Осомничениот е притворен, а мотивите за нападот сè уште не се познати. Претседателот Трамп ја искористи трагедијата за да ја критикува досегашната политика кон бегалците, обвинувајќи ја администрацијата на Бајден дека дозволила „опасни луѓе“ да влезат во земјата.
