Првообвинетиот Дејан Јованов-Деко и сите останати обвинети денеска во судницата се изјаснија дека не се виновни за трагедијата во дискотеката „Пулс“. Секој од нив, еден по еден, изрази сочувство до семејствата на жртвите и посака повредените побрзо да се опорават, но категорично ги отфрлија обвинувањата.
Дејан Јованов, заедно со своето семејство, синот и братот, истакнаа дека се невини. И тројцата поранешни градоначалници – Николчо Илиев, Ратко Димитровски и Љупчо Папазов – исто така се изјаснија за невини. Актуелниот министер Шабан Салиу оцени дека обвинението е политички мотивирано и неосновано.
Поранешните министри за економија, Ваљон Сарачи и Крешнит Бектеши, исто така се изјаснија за невини. Други обвинети, пак, се пожалиле дека не им е јасно зошто се дел од процесот.
Пензионираниот градежен инспектор Огнен Ѓорѓиев рече:– „Јас немам врска со ова, сум пензионер и немам никаква вина. Обвинет сум само за да се пополни бројот.“
Зоран Николовски, кој во Министерството за економија работел само нецела година, истакна дека не работи таму веќе 13 години и не разбира зошто е обвинет.
Родителите на жртвите бурно реагираа на изјавите на обвинетите, по што судијката Диана Груевска Илиевска побара мир во судницата. Следното рочиште ќе продолжи со воведни зборови на бранителите на обвинетите.
Обвинети се: Дејан Јованов, Митко Стојанов, Михаил Јованов, Гроздан Милковски, Милка Едровска, Тодор Јованов, Огњан Георгиев, Љупчо Стаменков, Николчо Гоцев, Ратко Димитровски, Николчо Илијев, Љупчо Папазов, Јане Јанчески, Лазар Захариев, Ивица Грозданов, Мартин Горгиев, Стојанчо Димитријев, Шабан Салиу, Аднан Џафероски, Беким Максути, Џеват Селами, Љупчо Грнчиштанов, Ваљон Сараќини, Крешник Бектеши, Џеваир Камбери, Шовкет Хазари, Зоран Николовски, Беким Хаџиу, Арлинда Касапи, Миле Ампов, Блашка Ефтимова, Весна Кузмановска, Емил Митев, Размена Чекиќ-Дуровиќ, како и компаниите „ММММ КАФЕ“ ДООЕЛ Кочани, „РУБИКОН СЕКЈУРИТИ СОЛУШНС“ и „ВЕНЦИ ПРОЕКТ“ ДООЕЛ Кочани.
