Се бара решение за иднината на 550-те вработени во подружницата на руската компанија „Лукоил“ во Македонија, откако енергетскиот гигант одлучи да го продаде својот имот во странство поради санкциите што САД ги воведе за рускиот нафтен сектор.
Претседателот на Регулаторната комисија за енергетика, Марко Бислимоски, изјави дека „Лукоил Македонија“ треба да добие можност да продолжи со работа и да обезбедува нафтени деривати од други извори, надвор од Русија. Тој додаде дека компанијата презема мерки за да се обезбеди дека вработените нема да останат без работа.
„Досега најголемиот дел од дериватите ги набавувале од Бугарија, но можат да обезбедуваат и од други земји, така што треба да им дадеме шанса да продолжат со работа“, истакна Бислимоски.
„Лукоил Македонија“ моментално располага со 40 бензински пумпи и 10 складишта за гориво со вкупен капацитет од 8.320 кубни метри.
