Доктор Сашко Кедев успеа во нешто што досега не му успеало на ниту еден Македонец – да ги искачи сите 14 планински врвови повисоки од 8.000 метри.
Утрово, како дел од тимот на експедицијата G1 предводена од „Имеџин Непал“, тој успешно се искачи на врвот Гашербрум I (8.080 м) во Пакистан. Со него беа и Ванг Жонг од Кина, како и непалските алпинисти Дава Гјалје Шерпа и Нгима Нуру Шерпа.
„Со ова успешно искачување, д-р Кедев го означува завршувањето на сите 14 осумилјадници – историски прв за Македонија!“, соопшти експедицијата.
Овој неверојатен подвиг го става Кедев во светскиот клуб на врвни алпинисти и е вистинска гордост за нашата земја.
