Обилните врнежи од дожд кои во последните денови го погодија источниот регион предизвикаа сериозни поплави на простории и дворови во повеќе објекти во Општина Чешиново-Облешево, вклучително и во селата Чешиново, Облешево и Чифлик, потврди директорот на ЦУК, Мухамед Али.
Али нагласи дека, според информациите од градоначалникот на општината, локалната самоуправа со сите расположливи ресурси активно интервенира на терен. Во акциите учествуваат ТППЕ Кочани, Водостопанство „Брегалница“ и РЦУК Кочани, а побарана е и дополнителна материјално-техничка поддршка за испумпување вода од поплавените објекти.
Поради обилните врнежи, реките Брегалница и Кочанска река достигнаа значително зголемен водостој, а на одредени локации во општините Штип и Чешиново-Облешево е забележано нивно излевање од коритата, предизвикувајќи дополнителни ризици за населението и инфраструктурата.
