Физичко-хемиските и микробиолошките анализи на водата од ОУ „Димо Хаџи Димов“ покажаа дека сите параметри се во рамките на референтните вредности и дека тешки метали не се пронајдени, соопшти Институтот за јавно здравје (ИЈЗ).
Во средата, голем број ученици од прво до петто одделение пријавиле стомачни болки, меѓу нив и синот на премиерот Мицкоски. Претходните анализи на мостри од храна и работни површини покажаа присуство на фекални бактерии Enterobacteriaceae во мусаката и на неколку површини од кујната и училиштето, што укажува на нехигиена. Од седум примероци на биолошки материјал од децата кои пријавиле симптоми, шест се позитивни на Norovirus, вирус кој се пренесува преку вода или храна заразена со фекалии и може долго да преживее на работни површини.
ИЈЗ, заедно со приправни и дежурни екипи, продолжува со анализата на пристигнатите мостри и биолошки материјали од училиштата за брзо и ефикасно справување со ситуацијата. За мострите од другите девет училишта ќе биде информирано в понеделник.
Покрај водата, која е безбедна, фекални бактерии се пронајдени на три чешми во училиштето – две во училниците и една во кујната, како и во мусаката. Кај една од вработените во кујната е откриена стафилокока, а кај едно дете норовирус. Директорката на ИЈЗ, Марија Андоновска, истакна дека засега не може целосно да се заклучи причинителот на стомачните тегоби кај децата.
Досега се пријавени 29 случаи, плус една наставничка, а пет деца биле хоспитализирани во Детската клиника, со дополнителни две деца донесени вчера. Сите деца се во добра здравствена состојба и стабилни.
