Премиерот Христијан Мицкоски изјави дека Владата и понатаму ќе ги субвенционира сметките за електрична енергија за сите домаќинства и потрошувачи кои се на регулираниот пазар. Оваа одлука, според него, е клучна за да се избегне ценовен шок и драматичен раст на трошоците за граѓаните.
Одговорајќи на новинарско прашање, Мицкоски истакна дека Регулаторната комисија е таа што ќе ја одреди конечната цена на електричната енергија, но Владата веќе обезбедила поддршка за да се задржи стабилноста на пазарот.
„Регулаторот одлучува за висината на цената на електричната енергија. ЕВН Хоме е снабдувачот кој има јавна набавка за цела година за 2026 година, а ЕСМ согласно политиките на Владата ги достави потребните количини согласно јавната набавка“, изјави премиерот.
Тој потсети дека владините субвенции биле критикувани и во извештаите на ЕУ, но истакна дека одлуката да не се либерализира целосно пазарот била неопходна за заштита на граѓаните.
„Да воведевме целосна либерализација, цената на електричната енергија немаше да биде 62 или 65 евра по мегават. Таа ќе надминуваше 100 евра. Тоа ќе значеше шок и поскапување за фантастични 50 проценти. Оваа одлука ја преземаме со целосна политичка одговорност“, додаде Мицкоски.
Тој ја објасни и методологијата по која се формира финалната цена, која ја плаќаат граѓаните: трошоците на снабдувачот, дистрибутерот, преносниот оператор и организирањето на пазарот. Дури кога сите параметри ќе бидат пресметани, Регулаторната комисија ја носи конечната одлука.
ЕСМ, според премиерот, предложило цена од 65 евра по мегават-час, што е само 3 евра повеќе од минатата година, односно зголемување од околу 4 проценти. И покрај ова, пазарната цена на слободниот пазар, како што посочи, надминува 100 евра, што ја прави владината интервенција клучна.
„Владата ќе ја покрие разликата, за да нема ценовен шок. Ќе продолжиме да ја субвенционираме струјата за домаќинствата и за сите корисници на регулираниот пазар“, порача Мицкоски.
