Во Македонија бројот на постари лица постојано расте, што јасно укажува на потребата од поголем број домови за згрижување на старите лица. Најизразен е проблемот во Скопје, каде што капацитетите се недоволни, а многу семејства со месеци или години чекаат да обезбедат место за своите најблиски.
За време на неодамна одржаните локални избори, бројни градоначалници дадоа предизборни ветувања за изградба на нови старски домови или за реконструкција на постојните институции. Очекувањата на граѓаните се големи, бидејќи токму највозрасните генерации се оние што ја изградиле државата и заслужуваат достоинствена и безбедна старост. Времето кога ветувањата треба да се претворат во реални проекти одамна настапи.
Паралелно со јавниот сектор, се поставува и прашањето за поддршка на приватни инвеститори кои би вложувале во вакви установи. Но, таквиот напредок мора да оди рака под рака со строга законска регулатива, контрола и редовен надзор. Без тоа, ризикот за злоупотреби и негрижа останува висок.
Ова не е само теоретско предупредување – примерот од пред неколку месеци тоа јасно го покажа. Тогаш полицијата откри сериозни случаи на малтретирање во повеќе старски домови во Скопје. Според наодите, штитениците биле врзувани, тепани, оставени без медицинска помош, а им била давана храна со поминат рок. Некои од нив дури спиеле по две лица во еден кревет. По обелоденувањето на случајот, одговорните лица беа уапсени.
Овој случај покажа дека не е доволно да се изградат домови – потребно е да бидат безбедни, регулирани и под строг надзор. Старите лица не се бројка или обврска. Тие се наши родители, баби, дедовци – луѓе кои имаат право на достоинствено живеење во последните години од нивниот живот.
Македонија мора да се подготви за демографската реалност што веќе пристигна – а тоа значи повеќе капацитети, обука на персонал, контролa и нула толеранција за нечовечки однос.
