Пензионерите во Македонија се соочуваат со неизвесност околу најавеното линеарно зголемување на пензиите, откако Уставниот суд, под водство на судијката Добрила Кацарска, започна постапка за оценка на уставноста на оваа мерка. Како реакција, во понеделник, 1 декември, со почеток во 11 часот, пензионери од целата држава ќе протестираат пред Уставниот суд во Скопје.
Контроверзата ја потресе македонската судска сцена, бидејќи линеарното зголемување, кое во текот на есента и наредната пролет им донесе по 2.000 денари дополнително на сметките на стотици илјади пензионери, сега е ставено под сомнеж. Уставниот суд наведува дека постои наводен проблем со дискриминација на пензионерите со повисоки пензии во однос на оние со минимални пензии, аргумент што беше оспорен од професорот и лидер на партијата „Единствена Македонија“, Јанко Бачев. Тој тврди дека зголемувањето треба да биде линеарно, за да биде праведно за сите.
Денеска, лидерот на СДСМ, Венко Филипче, неочекувано ја застапи позицијата за процентуално зголемување, кое би фаворизирало помала група богати пензионери, наместо да биде во корист на сите.
И покрај тврдењата за наводна загрозеност на пензискиот систем, Фондот на пензиско и инвалидско осигурување (ПИОМ) уверува дека исплатата на пензиите се одвива нормално. На 1 декември 2025 година, пензионерите ќе ја добијат ноемвриската пензија во вкупен износ од 9.297.493.427 денари.
Владата ја гарантира редовната исплата на пензиите и нагласува дека пензионерите нема причина за страв. Фондот на ПИОМ, во координација со Владата, ќе продолжи да ја врши исплатата секој први во месецот и во 2026 година.
