Додека светот стравува од масовни хакерски напади, граѓаните на Македонија најчесто стануваат жртви на поевтини, но подмолни измами. БИРН објави извештај за дигиталните права и нивното прекршување на Балканот, откривајќи дека економските измами и пирамидалните шеми се најчести во земјава.
Според извештајот, дури 38,5% од прекршувањата во дигиталниот простор се поврзани со економски криминал, што ја прави оваа категорија најбрзо растечка. Криминалците сè повеќе ги таргетираат онлајн финансиските системи и користат нови технологии како „deep fake“ и вештачка интелигенција за да ги измамат граѓаните.
Речиси 60% од сторителите се индивидуалци, додека за голем дел од нивната идентичност не е познато од каде доаѓаат. Главната мета се граѓаните – три четвртини од жртвите и потенцијалните жртви се токму обични луѓе. Политичарите, партии или компании ретко се таргетирани.
Само 35% од населението има базични дигитални вештини, што ја зголемува ранливоста кон онлајн измамите кои експлоатираат незнаење за безбедносни мерки. Во извештајот се спомнуваат дури 85 случаи каде измамниците користеле познати лога, јавни личности и линкови кои ветуваат профит.
Измамниците често се претставуваат како брендови, јавни институции или познати личности за да соберат лични податоци како телефонски броеви, адреси и банкарски информации. Иако граѓаните стануваат сè поскептични, објавите што имитираат доверливи компании сè уште привлекуваат илјадници интеракции.
