Швајцарски нуркачи и археолози дојдоа до извонредно откритие кое фрла ново светло врз римското минато на Европа. Во реката Аре, во близина на градот Золотурн, беше пронајден древен римски мост стар околу 1.700 години, по кој научниците трагаа со години.
Откритието било направено за време на рутински археолошки истражувања поврзани со подготовките за изградба на нов мост во областа. Иако долго време постоеле претпоставки дека на ова место се наоѓаат остатоци од древна конструкција, дури сега се обезбедени конкретни докази што ја потврдуваат нивната старост и значење.
Археолозите со години покажувале интерес за оваа локација поради нејзината стратешка положба. Подрачјето се наоѓало на една од најважните трансалпски трговски и воени рути што ги поврзувале различните делови на Римската Империја. Според истражувачите, мостот бил дел од главниот пат кој ја поврзувал древна Италија со регионот на реката Рајна.
Клучниот доказ биле дрвените колци долги речиси два метра, кои биле пронајдени распоредени во правец на течението на реката. По деталните анализи на дрвото и останатите делови од конструкцијата, експертите утврдиле дека мостот потекнува од четвртиот век.
Ова откритие има особена вредност бидејќи се верува дека станува збор за еден од ретките, а можеби и единствениот зачуван пример на дрвен мост на столбови од тој период. Благодарение на тоа што со векови се наоѓал под вода, дрвото останало зачувано во многу подобра состојба отколку што би било доколку било изложено на воздух.
Поради неговата исклучителна историска вредност, остатоците нема да бидат отстранети од реката. Според експертите, изложувањето на воздух би можело сериозно да го оштети материјалот стар речиси две милениуми. Затоа мостот ќе остане на своето место, додека научниците ќе продолжат со неговото проучување.
Истражувачите се надеваат дека понатамошните анализи ќе откријат нови детали за начинот на кој бил изграден мостот, како функционирал и каква улога имал во огромната мрежа на патишта што ги поврзувала областите околу Средоземното Море со северна Европа.
Денешниот Золотурн е познат како живописен швајцарски град, но во римско време претставувал важна стратешка точка токму поради неговата местоположба покрај реката Аре. Откриениот мост уште еднаш потврдува колку било значајно ова подрачје за трговијата, транспортот и воените движења во времето на Римската Империја.
